My ouma was ‘n bibliotekares uit Afrika
Sy het gekom in die Groot Trek
Ander se stories hier kom bêre
Sodat ek my eie drome hier kan skryf
My ouma was 'n ontwerper uit Berlyn
Sy het gekom op die wind
Haar glitter hier kom plant
Sodat ek diamante op my mure kan hang
My ouma was developer langs Steve Jobs
Sy het gekom in 'n algoritme
Haar kode hier kom versteek
Sodat ek Bitcoins kan ontgin
My ouma was 'n prostituut uit Frankryk
Sy het gekom op die rug van 'n man
Haar bed hier kom maak
Sodat ek tussen die lakens kan lag
My ma is ‘n vrou in Gauteng
Sy het gebly omdat sy moes
Haar klippe daar gekou
Sodat ek my eie huis hier kan bou